Juventusi po bën gjithçka për t’i rrëmbyer Realit të Madridit asin portugez, Kristiano Ronaldo.
E ndërsa deri para pak ditësh konsiderohej thjesht si zhurmë merkato, duket se tani po transformohet pak e nga pak në një përpjekje të vërtetë. Agnelli dhe Marotta po punojnë për të sjellë në Torino superyllin portugez. Juve duket e gatshme për t’u afruar madrilenëve 100 milionë për të siguruar shërbimet e Ronaldos, ku këtij të fundit i garanton një pagë prej 120 milionë eurosh për 4 vite kontratë.
Kalimi do të ishte i çmendur, sikurse edhe shifrat që përmenden momentalisht, por ëndrra e Juventusit mbetet si përherë fitimi i Champions League. E në këto kushte, kush më mirë sesa CR7 mund të ndihmojë bardhezinjtë? Megjithatë, ende nuk mund të thuhet asgjë, por gjithçka mbetet për t’u parë deri në fund të merkatos.